11. Dibere Hirup, Teu dibere Paeh
Duh aduh Gusti,
Pangeran abdi
Bet naha,
Kuring teu bisa paeh?
Padahal sadaya
Nu kagungan napsi
Bakal maraot
Na pedah abdi teu boga jiwa?
Na pedah abdi teu boga rasa?
Sumuhun abdi teh teu aya
Teu aya nu ngarencangan
Komo dugi mangsa abadi
12. Hyang Manon
Sadaya puji disanggakeun
Ka Pangeran saeusi alam
Neda widi,
Hoyong cumarita
Allahna nu Maha Uninga
Hyang Manon nu mo kasilih
Ratu ti sagala Ratu
Nu ningali sadayana
Nu kagungan sadaya rasiah
Nu teu disanggemkeun
Ku langit bumi
Dugi ka bumi paling ageung
Teu aya sesa panyesa
13. Bentang Timur
Endah bodas tur mentrang
Di langit ka subuhkeun
Endah,
Saendah-endahna bentang
Leuwih endah ti bentang ageung
Leuwih endah ti bentang Anteh
Ukur leutik satitik di langit wetan
Matak enak nu ningali
Kaendahan mah lain sual ukuran
Tapi jadi diri nu sajati
14. Panceg
Panceg maju
Pantrang mundur
Moal ngabalieur
Keukeuh
Naon wae nu aya hareupeun
Ku kami dihareupan
Demi Hyang Rahman
Nu Maha welas asih
15. Dewi Sarangenge
Hiji mangsa
Kami Hyang Rahman
Kagungan putra,
Caang mencrang
Ti anjeunna lungsur mangpaat
Di alam tata surya
Ngaping tilu belas putra
Pertiwi salah sahijina
Putra katilu nu dipikaasih
Leuwih-leuwih ti nu bodas
Leuwih-leuwih ti nu beureum
Oh,
Dewi Sarangenge
16. Cahya Puji
Hayu suang maos
Hayu urang maos
Maos asbabun nujulna
Alam langit katut bumi
Anjeun nu mulya
Ti saacan ngawujud jalmi
Anjeun nu mulya
Dunga keur anjeun
Sami dungana keur arurang
Anjeun nu moal poho
Nu nyaah ka arurang
Malah kami oge teu acan araya
17. Indung
Indung Dunya
Leres,
Gusti Suci
Ratu sadaya ratu
Nu kagungan kakuatan
Nganggo hiji jat
Pibakaleun sadaya panincakan
Tina panas dugi ka tiisna
Tina nu maceuh
Dugi ka someahna
Supaya jadi panincakan
Sadaya kaom
18. Agni
Ulah baong
Ulah osok bedegong
Jadi asal sadaya banda
Ulah sok ujug
Ulah sok adigung
Hirup tina maehan
Turunan sorangan
Ulah sok caliweura
Hayang wae ka surga
Tiheula
Da puguh
Mega mah moal
Bisa dijugjug
19. Panceg Ati
Panceg Peugeuh Kahayang Ati
Saleutik-leutikna
Moal sieun-sieun acan
Bisa nyeureud nu gede
Saleutik-leutikna
Bisa mere raheut
Masing leutik oge
Moal ingkah tina kahayang
Ti mimiti lahir
Paratkeun dunya surgawi
Leutik-leutik oge
Bisa maehan
Demi cumpon kahayang
20. Maturan Pertiwi Salawasna
Beda banda
Beda rasa
Beda kahayang
Beda cara mikir
Ieu nu pihadeeun
Kudu jadi baturna
Maturan Dewi Pertiwi
Titisan Kahyangan
Dwi rupa nu ngaeka
Pikeun jadi conto
Hirup sauyunan